বালিজুৰিত বন্যহস্তীৰ মুক্ত বিচৰণ, আতংকিত চাহ বাগিচাৰ শ্ৰমিক

চামগুৰি: নগাঁও জিলাৰ বালিজুৰি চাহ বাগিচাত বন্যহস্তীৰ মুক্ত বিচৰণ ৷ খাদ্যৰ সন্ধানত পাহাৰীয়া অঞ্চলৰ পৰা চাহ বাগান আৰু দাঁতিকাষৰীয়া অঞ্চলত বৃহৎ হাতীৰ জাকটোৱে বিচৰণ কৰাত আতংকিত হৈ পৰিছে ৰাইজ ৷ স্থানীয় ৰাইজে জনোৱা অনুসৰি, বৰ্তমানে বালিজুৰি চাহ বাগানৰ বিভিন্ন অংশত প্ৰায় ২০-৩০টা বন্যহস্তীৰ এটা জাক মুক্ত বিচৰণ কৰি আছে । দিনৰ ভাগত পাহাৰীয়া অঞ্চলত আশ্ৰয় লোৱা হাতীৰ জাকটোৱে ৰাতি হ'লে চাহ বাগান নষ্ট কৰে । ফলত চাহ বাগানৰ কাম কৰা শ্ৰমিক আৰু দাঁতিকাষৰীয়া অঞ্চলত বসবাস কৰা লোকসকলৰ মাজত আতংকই বিৰাজ কৰিছে ।স্থানীয় লোকে কয়, "ৰাতিৰ সময়ত হাতীয়ে ঘৰৰ কাষত বিচৰণ কৰি থকাত শিশু আৰু মহিলাসকলক ঘৰৰ বাহিৰলৈ ওলাই অহাটোৱে বিপজ্জনক হৈ পৰিছে । অঞ্চলটোত মানুহ-হাতীৰ সংঘাত বহু দিনৰে পৰা এক সমস্যা হৈ পৰিছে । বন বিভাগে হাতীৰ জাকটোক পুনৰ পাহাৰলৈ খেদি পঠোৱাৰ বাবে কোনো কাৰ্যকৰী ব্যৱস্থা গ্ৰহণ কৰা নাই ।"লগতে পঢ়ক : অসম-নাগালেণ্ড সীমান্তত নগাৰ তাণ্ডৱ, বন্ধ কৰিলে জব কাৰ্ডৰ কাম