సంగారెడ్డిలో బోనాల ఉత్సవాలు - పోతరాజులతో కలిసి జగ్గారెడ్డి చిందులు

Bonalu Celebrations In Sangareddy : రాష్ట్రవ్యాప్తంగా ఆషాఢమాస బోనాలు ఆదివారం ఘనంగా జరిగాయి. హైదరాబాద్ సహా​ పలు జిల్లాల్లోనూ బోనాల జాతర వేడుకలు ఉత్సవంలా జరిగాయి. ఉదయం నుంచే భక్తులు ఆలయాలకు క్యూ కట్టారు. ఇదే క్రమంలో సంగారెడ్డి జిల్లా కేంద్రంలోనూ బోనాల ఉత్సవం అంగరంగా వైభవంగా జరిగింది. ఈ జాతరను గంగపుత్రుల సంఘం ఆధ్వర్యంలో నిర్వహించారు. ఆలయ అర్చకులు అమ్మవారికి ప్రత్యేక పూజలు నిర్వహించారు. భక్తులు అధిక సంఖ్యలో పాల్గొని అమ్మవారికి బోనం సమర్పించి మొక్కులు తీర్చుకున్నారు. అమ్మవారిని డప్పుల చప్పులతో ఊరేగించారు. ఈ కార్యక్రమంలో టీపీసీసీ వర్కింగ్​ ప్రెసిడెంట్​ జగ్గారెడ్డి పాల్గొని అమ్మవారికి ప్రత్యేక పూజలు నిర్వహించారు. అనంతరం పోతరాజులతో కలిసి స్టెప్పులు వేసి అక్కడి వారిని ఉత్సాహపరిచారు. ఈ సందర్భంగా భక్తులకు ఎలాంటి ఇబ్బందులు కలగకుండా ఏర్పాట్లు చేసినట్లు తెలిపారు. ఎలాంటి గొడవలకు తావులేకుండా పోలీస్​ భద్రత ఏర్పాటు చేశామన్నారు. యువత మత్తు పదార్థాలకు, ఫోన్​లకు దూరంగా ఉండాలని జగ్గారెడ్డి సూచించారు.