హైదరాబాద్‌లో భారీ శబ్దం - ఒక్కసారిగా ఉలిక్కిపడ్డ స్థానికులు

Loud Sounds in Hyderabad : హైదరాబాద్‌లో భారీ శబ్దం సంభవించింది. దీంతో స్థానికులు ఒక్కసారిగా ఉలిక్కిపడ్డారు. ఉప్పర్‌పల్లి, ఎర్రబోడ, లంగర్‌హౌస్, కేశవస్వామి నగర్‌లో ఈ శబ్దం వినిపించింది. ఉదయం 9:15 గంటల సమయంలో బ్లాస్టింగ్‌ను తలపించేలా భారీ శబ్దం వచ్చిందని స్థానికులు చెబుతున్నారు. ఎక్కడైనా బ్లాస్టింగ్ చేశారా? లేదా భూకంపం ఏమైనా వచ్చిందా? అంటూ ప్రజల్లో చర్చ మొదలైంది. ఈ భారీ శబ్దం వెనక కారణాలపై పోలీసులు ఆరా తీస్తున్నారు.రాజేంద్రనగర్‌లో కొన్ని సెకన్ల పాటు భూమి కంపించిందని స్థానికులు చెబుతున్నారు. మొదటగా ఎక్కడైనా గ్యాస్​ పేలిందేమో అనుకున్నామని హైదర్​గూడలోని పలు కాలనీల వాసులు చెబుతున్నారు. శబ్దానికి అందరూ ఒకేసారి ఇళ్లలో నుంచి బయటకు వచ్చి చూశామని, కానీ ఏమైందో అర్థం కాలేదని తెలిపారు. ఏదైనా భవన నిర్మాణంలో ప్రమాదం జరిగిందా? భూమి కంపించిందా? లేదంటే ఎవరైనా బ్లాస్టింగ్​ చేశారా అనే అంశాలపై ఆరా తీస్తున్నామని, ప్రజలెవరూ అధైర్య పడొద్దని పోలీసులు తెలిపారు.