جنوبی کشمیر کے شوپیاں ضلع میں ہڑتال، احتجاجی مظاہرے، دکانیں بند

شوپیاں (شاہد ٹاک) : جنوبی کشمیر کے ضلع شوپیاں میں بدھ کو دفعہ 370 کی منسوخی کے بعد پہلی بار مکمل ہڑتال رہی۔ ہڑتال کے سبب دکانیں اور کاروباری ادارے بند رہے جبکہ سڑکوں پر ٹریفک کی نقل و حرکت بھی جزوی طور پر متاثر رہی۔  حالیہ دنوں تشکیل دی گئی ’’آل پارٹی کونسل‘‘ نامی تنظیم کی جانب سے اس وقت ہڑتال کی کال دی گئی جب ڈپٹی چیف ایجوکیشن آفیسر شوپیاں کے دفتر کو منتقل کیے جانے سے متعلق سرکاری حکمنامہ جاری ہوا۔ دفتر کی منتقلی سے متعلق سرکاری حکمنامے کے بعد شوپیاں کی بیشتر آبادی، سیاسی و سماجی کارکنان سیخ پا ہوئے۔  یاد رہے کہ ڈپٹی چیف ایجوکیشن آفس کو ایم ایل اے، زینہ پورہ، شوکت حسین گنائی کے آبائی گاؤں چتراگام منتقلی پر عوام نے شدید ناراضگی ظاہر کی اور اس فیصلے کو ’سیاسی‘ قرار دیا۔ اس فیصلے کے خلاف شوپیاں اور زینہ پورہ دونوں حلقوں میں گزشتہ کئی دنوں سے احتجاجی مظاہرے بھی کیے گئے۔