ഗുരുവായൂർ: അഷ്‌ടമുടി ആയുർവേദ നഴ്‌സിംഗ് ഹോമിന് സമീപമുള്ള വൈകുണ്‌ഠം അപ്പാർട്ട്മെൻ്റിലെ ലിഫ്റ്റിൽ കുടുങ്ങിയ തമിഴ്‌നാട് കരൂർ സ്വദേശികളായ ആറംഗ കുടുംബത്തെ ഫയർഫോഴ്‌സിൻ്റെ സമയോചിതമായ ഇടപെടലിൽ സുരക്ഷിതമായി രക്ഷപ്പെടുത്തി. ഗുരുവായൂർ അമ്പലത്തൽ ദർശനം നടത്താൻ എത്തിയ തമിഴ്‌നാട് സ്വദേശികളാണ് ലിഫ്റ്റിൽ കുടുങ്ങിയത്. കരൂർ സ്വദേശികളായ ദിനേഷ് (26), ലാവണ്യ (31), ഇളവരശി (29), ലത (55), എട്ടു വയസുകാരനാൻ, മൂന്നു വയസുകാരൻ എന്നിവരാണ് ലിഫ്റ്റിൽ കുടുങ്ങിയത്. ഇന്ന് രാവിലെ 11:30 യോടെയായിരുന്നു സംഭവം. ഗുരുവായൂർ ഫയർ ആൻഡ് റെസ്ക്യൂ സ്‌റ്റേഷൻ ഓഫീസർ സജിത് ലാൽ എസ് ഡിയുടെ നേതൃത്വത്തിലുള്ള സംഘമാണ് രക്ഷാപ്രവർത്തനം ഏകോപിപ്പിച്ച് കുടുംബത്തെ രക്ഷപ്പെടുത്തിയത്. ഗ്രേഡ് സ്‌റ്റേഷൻ ഓഫീസർ കെ സി സജീവ്, ഫയർ ആൻഡ് റെസ്ക്യൂ ഓഫീസർമാരായ നിതിൻ രാജ് എ ആർ, സമീർ എസ്, ദിപു ആർ, ഫയർ ആൻഡ് റെസ്ക്യൂ ഓഫീസർ ഡ്രൈവർ രഞ്ജിത് പാപ്പച്ചൻ എന്നിവർ രക്ഷാപ്രവർത്തനത്തിൽ പങ്കെടുത്തു. സംഭവസ്ഥലത്ത് ഗുരുവായൂർ പൊലീസും എത്തിയിരുന്നു. കുടുംബം സുരക്ഷിതരാണെന്ന് അധികൃതർ അറിയിച്ചു.
