మీ చరిత్ర అందరికీ తెలుసు : సీఎం రేవంత్​పై కవిత ఫైర్

Kavitha Latest Comments On Revanth Reddy : విద్యార్థుల విజయాన్ని ముఖ్యమంత్రి రేవంత్ రెడ్డి తన ఖాతాలో వేసుకోవడం సిగ్గుచేటని తెలంగాణ రక్షణ సేన చీఫ్‌ కల్వకుంట్ల కవిత మండిపడ్డారు. యువతకు ఇచ్చిన హామీలపై ఎక్కడ నిలదీస్తారోనని మీరే ఊరేగింపులు చేస్తారా అంటూ ధ్వజమెత్తారు. హైదరాబాద్‌లో ఈ మేరకు కవిత వీడియో విడుదల చేశారు. కొవ్వొత్తులు పట్టుకొని ఉరేగితే విద్యార్థులు మిమ్మల్ని నమ్మరు, మీ చరిత్ర అందరికీ తెలుసునని సీఎంను ఉద్దేశించి విమర్శించారు. విద్యార్థులు, యూత్​ను పట్టించుకోని ముఖ్యమంత్రి 21 ఏళ్లకే యువత పార్లమెంట్​లో ఉండేలా బిల్లు తెస్తామంటున్నారని ఎద్దేవా చేశారు. యువతకు ఇస్తామన్న 2 లక్షల ఉద్యోగాలు, జాబ్ క్యాలెండర్, ఫీజు రీయింబర్స్​మెంట్ ఏదీ మీరు చేయలేదన్నారు. అందుకే మిమ్మల్ని యువత నమ్మే అవకాశం లేదని పేర్కొన్నారు. అసెంబ్లీలో ఏ బిల్లు పెట్టిన సరే కేంద్రం వద్ద ఆ బిల్లు పాస్ కాకుండా లాలూచీ పడుతున్నారన్నారు. ఆ విషయం బీసీలకు, తెలంగాణ ప్రజలకు బాగా తెలుసని విమర్శించారు. ఇకనైనా ఇచ్చిన మాట నిలబెట్టుకోకపోతే తెలంగాణ యువత గద్దెదించటం ఖాయమని తెలిపారు.