'చంద్రబాబు తాతకు థాంక్స్' - ఒకే ఇంట్లో ముగ్గురు పిల్లలకు తల్లికి వందనం

TALLIKI VANDANAM SCHEME BENEFICIARIES: ఏపీ ప్రభుత్వం అమలు చేస్తున్న ‘తల్లికి వందనం’ నిధులు విద్యార్థుల తల్లులు, సంరక్షకుల బ్యాంక్ అకౌంట్లలో జమ అవుతున్నాయి. తల్లికి వందనం పథకాన్ని గురువారం నుంచి ఏపీ ప్రభుత్వం అమలు చేస్తున్న విషయం తెలిసిందే. ఒక్కో విద్యార్థికి 15,000 రూపాయల చొప్పున విడుదల చేసింది. ఇందులో 13,000 రూపాయలు లబ్ధిదారుల బ్యాంకు ఖాతాలకు, మిగతా రూ.2,000ను ప్రభుత్వ పాఠశాలల అభివృద్ధి కోసం కలెక్టర్ల అకౌంట్లలో జమ చేస్తున్నారు.ఈ నేపథ్యంలో తాజాగా ఓ కుటుంబంలోని ముగ్గురు పిల్లలకు సంబంధించి 39,000 రూపాయలు అకౌంట్​లో జమ అయ్యాయి. ప్రభుత్వం ఇచ్చిన హామీ మేరకు 2025-26 విద్యా సంవత్సరానికి సంబంధించిన తల్లికి వందనం పథకాన్ని అమలు చేసిన కూటమి ప్రభుత్వానికి తల్లిదండ్రులు కృతజ్ఞతలు తెలిపారు. అర్హులైన ఎంత మంది విద్యార్థులు ఉంటే అంతమందికి డబ్బులు వేయడం సంతోషంగా ఉందని విద్యార్థుల తల్లిదండ్రులు, విద్యార్థులు పేర్కొన్నారు. ఈ సందర్భంగా సీఎం చంద్రబాబుకు, డిప్యూటీ సీఎం పవన్ కల్యాణ్​, విద్యా శాఖా మంత్రి నారా లోకేశ్​కు ప్రత్యేకంగా ధన్యవాదాలు తెలిపారు.