ఆక్రమణలపై హైడ్రా హై నజర్​ - కబ్జా అని తేలితే కూల్చేయటమే!

Hydra Focus on Illegal Constructions : హైడ్రా! రాష్ట్ర రాజధానిలో కొద్దిరోజులుగా సంచలనంగా మారిన పేరిది. కబ్జాకారుల గుండెల్లో దడ పుట్టిస్తూ అక్రమ కట్టడాలు నేలమట్టం చేస్తూ ప్రజా ఆస్తుల సంరక్షణే ధ్వేయంగా ముందుకు సాగుతోంది హైడ్రా. సర్కారు భూములు, చెరువుల ఆక్రమణలపై చర్యలతో పాటు విపత్తుల నిర్వహణ కోసం రూపు దిద్దుకున్న హైడ్రా అక్రమార్కుల వెన్నులో వణుకు పుట్టిస్తోంది. తొలి ప్రాధాన్యతగా కాంక్రీట్ జంగిల్‌లో చిక్కి శల్యమవుతున్న నీటి వనరులను సంరక్షించడంపై హైడ్రా దృష్టి సారించింది. హైదరాబాద్ మహానగరంలో 44 ఏళ్లుగా చెరువులు, కుంటల విధ్వంసాన్ని ఇటీవల వెల్లడించిన హైడ్రా 4ఏళ్లలో పరిస్థితి మరింత చేయిదాటి పోయిందని ప్రకటించింది. అలాగే వదిలేస్తే భాగ్యనగర భవిష్యత్ ప్రమాదంలో పడవచ్చన్న ఆందోళన వ్యక్తం చేసింది. పరిస్థితి చేయిదాటక ముందే మూడంచెల కార్యాచరణను మొదలు పెట్టింది. నీటి వనరులను కాపాడటమే కర్తవ్యంగా ముందుకు సాగుతుంది.