అమీన్​పూర్​ జలమయం - మునిగిన అపార్ట్​మెంట్​ సెల్లార్​

Heavy Rain In Ameenpur Sangareddy :  సంగారెడ్డి జిల్లా అమీన్​పూర్​లో సోమవారం రాత్రి భారీ వర్షం కురిసింది. దీంతో పలుచోట్ల రహదారులు జలమయం అయ్యాయి. రాఘవేంద్ర కాలనీలో ఓ అపార్ట్​మెంట్​ సెల్లార్​లోకి నీరు చేరింది. దానివల్ల సెల్లార్​లో పార్క్​ చేసిన కార్లు నీటిలో మునిగిపోయాయి. వాటిని బయటికి తీసేందుకు కాలనీవాసులు తీవ్రంగా శ్రమించారు. ఫైర్​ సిబ్బంది అక్కడకు చేరుకుని మోటార్ల సహాయంతో నీటిని బయటకు పంపించారు.వర్షం కారణంగా కాలనీవాసులు తీవ్ర ఇబ్బందులకు గురి అయ్యారు. అలాగే జయలక్ష్మి నగర్ కాలనీలో రహదారి వర్షపు నీటితో నిండిపోయింది. ఆ నీళ్లలో నుంచే వాహనదారులు రాకపోకలు సాగించారు. రహదారికి ఆనుకుని కొన్ని కరెంట్ స్తంభాలు ఉన్నాయి. దీనివల్ల ఆ ప్రాంతం ప్రమాదకరంగా మారింది. రోడ్డుపైనే నదిలా ప్రవహిస్తున్న వర్షపు నీరు వల్ల పట్టణవాసులు తీవ్ర ఇబ్బందులు పడ్డారు. ఎప్పుడు ఏ ప్రమాదం జరుగుతుందోనని స్థానికులు భయాందోళనకు గురయ్యారు. నీరు నిలిచిపోవటం వల్ల రోగాలు వచ్చే అవకాశం ఉందని, ఇప్పటికైనా అధికారులు స్పందించి సమస్య పునరావృతం కాకుండా చర్యలు తీసుకోవాలని విజ్ఞప్తి చేశారు.