कोरोनाच्या काळात अनेक तरूणांच्या नोकऱ्या गेल्या. तर काही तरूणांनी शेतीला जोडधंदा सुरू केला आहे. अशाचं वेळी अमरावती जिल्ह्यातील शेतक-याने 4 हेक्टर शेतातून लाखोंचं उत्पादन काढलं आहे. पारंपारिक शेती सोडून बागायती शेती केल्याने किती फायदा होतो हे या तरूणाने अनेकांना दाखवून दिलंय. जिल्ह्यातील मंगरूळ दस्तगिर येथील किरण इंगळे या युवा शेतकऱ्याने वयाच्या 24 व्या वर्षी अनोखा प्रयोग केला आहे. शेतीची आवड असल्याने किरणने 12 वी पर्यंतच शिक्षण पूर्ण करून शेतात मेहनत घ्यायला सुरुवात केली. किरणने टमाटर, वांगे, संत्रा, चवळी, मिरची, गोबी, कांदा अश्या विविध पालेभाज्यांची लागवड केली आहे. किरणला 10 लाखांचं उत्पादन मिळालं असून यावर्षीही अधिक नफा होऊ शकतो असा अंदाज त्याने व्यक्त केला. या युवा शेतकऱ्याचं सगळीकडेच कौतुक होत असून त्याने अनेक तरूण शेतक-यांना एक आदर्श घालून दिला आहे.
