एकीकडे आयपीएल लिलावात बाकीचे संघ कोट्यवधी मोजून दिग्गज खेळाडूंचा समावेश आपल्या संघात करुन घेतायेत, तर मुंबई इंडियन्स फ्रँचायझी काहीशी संथ दिसतीय असं काहीसं चित्र होतं. पण आकाश अंबानींनी एकच डाव टाकला आणि इंग्लंडचा वेगवान गोलंदाज जोफ्रा आर्चरला आपल्या ताफ्यात सहभागी करुन घेतलंय. मुंबई इंडियन्सने जोफ्रा आर्चरला खरेदी करण्यासाठी सनरायझर्स हैदराबाद आणि राजस्थान रॉयल्सला टक्कर दिली. कारण, या दोन्ही संघांनीही बोली लावण्यात आघाडी घेतल्यामुळे जोफ्रा आर्चरचा भाव वधारला आणि त्याच्यासाठी मुंबईला तब्बल ८ कोटी मोजावे लागले. पण हे आठ कोटी मोजूनही मुंबईने एक मोठी रिस्क घेतलीय. ही रिस्क म्हणजे जोफ्रा आर्चर आयपीएलमध्ये खेळणार की नाही हे अजूनही निश्चित नाही.
