వీడెవడండీ బాబూ - గుడిలో దేవుడి ముందున్న గంటలనే కోట్టేశాడు

Temple Bell Stolen Incident in Yadadri Bhuvanagiri District : సాధారణంగా దొంగలు ఇళ్లలో బంగారం, వెండి లాంటివి చోరీకి పాల్పడటం చూస్తుంటాం. అయితే ఈ దొంగ మాత్రం అందుకు భిన్నం. గుడిలో అమ్మవారి ముందున్న గంటలను చోరీ చేశాడు. అనంతరం గుట్టుచప్పుడు కాకుండా అక్కడి నుంచి చెక్కేశాడు. ఈ ఘటన యాదాద్రి భువనగిరి జిల్లాలోని బొమ్మలరామారంలోని పోచమ్మగుడిలో జరిగింది. ఈ తతంగమంతా గుడి వద్ద ఉన్న సీసీటీవీ కెెమెరాల్లో రికార్డయ్యింది. సీసీటీవీ దృశ్యాల్లో ఉన్న ప్రకారం కుబీర్ మండలంలోని రాజరాజేశ్వరుని ఆలయం వద్దకు తలకు హెల్మెట్​ ధరించి ఉన్న ఓ గుర్తు తెలియని దొంగ ప్రవేశించాడు. అక్కడ కొంతసేపు అటూ ఇటూ తిరిగాడు. అనంతరం ఓ కట్టర్​ను తీసుకుని గుడిలో అమ్మవారి ముందున్న గంటను కట్​ చేశాడు. ఆ తర్వాత అక్కడి నుంచి ఉడాయించాడు. కాగా చోరీకి సంబంధించిన దృశ్యాలు గుడి వద్దనే ఉన్న సీసీటీవీ కెమెరాలో రికార్డయ్యాయి. ప్రస్తుతం ఆ వీడియోలు సోషల్​ మీడియోలో వైరల్​గా మారాయి. మరోవైపు గుడి గంట చోరీ ఘటన స్థానికంగా చర్చనీయాంశంగా మారింది. స్థానికులు భయాందోళనకు గురయ్యారు. ఈ ఘటనకు సంబంధించిన మరిన్ని వివరాలు తెలియాల్సి ఉంది.