ഐഎസ്ആർഒയുടെ 'യുവിക' ക്യാമ്പിലേക്ക് തെരഞ്ഞെടുക്കപ്പെട്ട് കാക്കവയൽ സ്വദേശി വൈഗ

വയനാട്: ഇന്ത്യയിലെ ഒൻപതാം ക്ലാസ് വിദ്യാർഥികൾക്കായി ഐഎസ്ആർഒ നടത്തിയ പരീക്ഷയിൽ മികച്ച വിജയം നേടി യുവിക ബഹിരാകാശ ഗവേഷണ ക്യാമ്പിലേക്ക് യോഗ്യത നേടിയ വൈഗയ്ക്ക് അഭിനന്ദന പ്രവാഹം. കാക്കവയൽ സ്വദേശികളായ സന്തോഷിൻ്റെയും രാജിയുടെയും മകളായ വൈഗയെ കല്പറ്റയിലെ അഡ്വ. ടി സിദ്ദിഖ് എംഎൽഎ വീട്ടിലെത്തി അനുമോദിച്ചു. ആകെ ഒന്നര ലക്ഷത്തോളം വിദ്യാർഥികൾ എഴുതിയ പരീക്ഷയിൽ നിന്നാണ് ഈ മിടുക്കി അഭിമാനാർഹമായ ഈ മികച്ച നേട്ടം സ്വന്തമാക്കിയത്.ഐഎസ്ആർഒയുടെ ക്യാമ്പിലേക്ക് കേരളത്തിൽനിന്ന് ആകെ 14 വിദ്യാർഥികളാണ് തെരഞ്ഞെടുക്കപ്പെട്ടത്. കാക്കവയൽ ഗവ. ഹയർസെക്കൻഡറി സ്കൂളിലെ വിദ്യാർഥിനിയാണ് വൈഗ. മേയ് 11 മുതൽ 22 വരെ തിരുവനന്തപുരം വിക്രം സാരാഭായ് റിസർച്ച് സെൻ്ററിലാണ് ബഹിരാകാശ ഗവേഷണ ക്യാമ്പ് നടക്കുന്നത്. ക്യാമ്പിലേക്ക് യോഗ്യത നേടിയ വൈഗ നാടിൻ്റെ തന്നെ അഭിമാനമാണെന്നും രാജ്യത്തിൻ്റെ വലിയ താരകമായി അവൾ ഉയർന്നു വരട്ടെയെന്നും അനുമോദന ചടങ്ങിൽ അഡ്വ. ടി സിദ്ദിഖ് എംഎൽഎ വിശദമാക്കി.നാടൊന്നാകെ വൈഗയുടെ ഈ മികച്ച നേട്ടത്തിൽ ഏറെ അഭിമാനിക്കുന്നുണ്ട്. നമ്മുടെ നാട്ടിലെ ഈ മിടുക്കിയെ നേരിട്ടെത്തി ആദരിക്കാൻ സാധിച്ചതിൽ വലിയ സന്തോഷമുണ്ട്. ഒന്നര ലക്ഷത്തോളം കുട്ടികൾ പങ്കെടുത്ത പരീക്ഷയിലാണ് വൈഗ മുൻപന്തിയിലെത്തിയത്. ഇന്ത്യൻ നാഷണൽ കോൺഗ്രസിൻ്റെ പ്രവർത്തകരെല്ലാം ഇതിൽ പങ്കാളികളാണ്. എല്ലാവരോടും പ്രത്യേകം നന്ദി അറിയിക്കുകയാണ്. അഭിമാനകരമായ വിജയം കരസ്തമാക്കിയ വൈഗ വരും തലമുറയ്ക്കും മറ്റ് കുട്ടികൾക്കും വലിയൊരു പ്രചോദനമായി മാറിയെന്നും എംഎൽഎ കൂട്ടിച്ചേർത്തു.