Report TV - Qeveria nxjerr në shitje INSIG, vlera 3 herë më e ulët se tenderi i 2009

TIRANË - Qeveria ka shpallur zyrtarisht tenderin për shitjen e 100% të aksione të agjencisë së sigurimeve INSIG. Kompania do të hidhet në treg me vlerën minimale 15.3 milionë euro. Ministria e Financave ka publikuar në faqen zyrtare të Agjencisë së Prokurimeve shpalljen për shitjen me tender të aksioneve të INSIG, si dhe kriteret e vlerësimit për përzgjedhjen e fituesit. Sipas formulës, peshën më të madhe të pikëve, prej 80 për qind, do ta ketë çmimi i ofruar nga konkurrenti, ndërkohë që plani i biznesit dhe cilësia e blerësit do të kenë respektivisht nga 10 pikë. Po ashtu, çdo kompani garuese duhet të garantojë ofertën e saj me një depozitë fikse prej 30 milionë lekësh.

Krahasuar me vitin 2009 kur kompania u nxor në shitje vlera e saj është ulur me gati 3 herë si pasojë e keqmenaxhimit. Gjatë këtyre viteve kompania ka humbur vazhdimisht terren në favor të konkurrentëve privatë. Nuk është hera e parë që ky subjekt del në shitje.

Që prej 6 vitesh, tentativat për shitjen e INSIG kanë dështuar rregullisht. Në vitin 2010, ka qenë një firmë amerikane që u shpall fituese e garës, pasi deklaroi se do t?i blinte të gjitha aksionet në pronësi të shtetit për 50 milionë dollarë, por më pas u tërhoq nga procedurat e tjera, duke bërë të dështonte shitja.

Opozita e atëhershme e majtë akuzoi qeverinë Berisha për afera të dyshimta dhe lidhje të amerikanëve me ish ministrin Fatmir Mediu, ndërkohë që vetë amerikanët sollën si argument për tërheqjen goditjen nga kriza globale që kishte dëmtuar financat e tyre.