কবিতা আবৃত্তি-গ্ৰন্থ অধ্যয়নত ৰাপ থকা নিয়ৰকণাৰ লক্ষ্য অধ্যাপক হোৱাৰ

সৰুপথাৰ : উচ্চতৰ মাধ্যমিক চূড়ান্ত পৰীক্ষাত সৰুপথাৰলৈ গৌৰৱ কঢ়িয়ালে নিয়ৰকণা ঢেকিয়াল ফুকনে । সৰুপথাৰ মহাবিদ্যালয়ৰ অসমীয়া বিভাগৰ সহযোগী অধ্যাপক ডঃ প্ৰণৱ ঢেকিয়াল ফুকন আৰু শিক্ষয়িত্ৰী শেৱালি গগৈৰ কন্যা নিয়ৰকণা ঢেকিয়াল ফুকনে ৰামানুজন ছিনিয়ৰ ছেকেণ্ডাৰী স্কুলৰ পৰা সদ্যঘোষিত ফলাফলত কলা শাখাত ৯৬.২% নম্বৰেৰে উত্তীৰ্ণ হয় ।নিয়ৰকণা ঢেকিয়াল ফুকনৰ এই অভূতপূৰ্ব সাফল্য সৰুপথাৰ সমজিলাৰ বাবে নিশ্চয়কৈ অত্যন্ত আনন্দ আৰু গৌৰৱৰ বিষয় । ৯৬.২% শতাংশ নম্বৰ লাভ কৰাটো তেওঁৰ কঠোৰ অধ্যৱসায় আৰু একাগ্ৰতাৰেই ফলশ্ৰুতি । তেওঁৰ এই কৃতিত্বই কেৱল সৰুপথাৰ অঞ্চললৈকে নহয়, বৰঞ্চ সমগ্ৰ ৰাজ্যখনৰ শিক্ষাৰ্থীসকলৰ বাবেও এক প্ৰেৰণা ।ইফালে নিয়ৰকণাৰ এই অভূতপূৰ্ব সাফল্যৰ খবৰ বিয়পি পৰাৰ লগে লগে সমগ্ৰ সৰুপথাৰ অঞ্চলত এক আনন্দৰ পৰিৱেশে বিৰাজ কৰিছে । অঞ্চলটোৰ ৰাইজে তেওঁৰ বাসগৃহত উপস্থিত হৈ অভিনন্দন জ্ঞাপন কৰে ।আনহাতে, নিজৰ সফলতাৰ আঁৰত তেওঁৰ অভিভাৱকৰ পথ প্ৰদৰ্শন আৰু বিদ্যালয়ৰ শিক্ষক-শিক্ষয়িত্ৰীসকলৰ কঠোৰ পৰিশ্ৰমৰ কথা ছাত্ৰীগৰাকীয়ে সংবাদ মাধ্যমৰ আগত প্ৰকাশ কৰে ।  উল্লেখ্য যে শৈশৱৰে পৰা কবিতা আবৃত্তি, গ্ৰন্থ অধ্যয়নত বিশেষ ৰুচি থকা নিয়ৰকণাই ভৱিষ্যতে এগৰাকী আদৰ্শ অধ্যাপক হোৱাৰ লক্ষ্য বান্ধি লৈছে । জ্ঞান অন্বেষণৰ প্ৰতি থকা তেওঁৰ এই ধাউতিয়ে তেওঁক লক্ষ্যপ্ৰাপ্তিত সহায় কৰিব বুলি পৰিয়ালবৰ্গই আশা প্ৰকাশ কৰিছে । নিয়ৰকণাৰ এই যাত্ৰাই অঞ্চলটোৰ অন্যান্য শিক্ষাৰ্থীসকলকো যথেষ্ট উৎসাহিত কৰি তুলিছে ।লগতে পঢ়ক :এফালে পিতৃৰ দহা, আনফালে ফলাফল : ৭৬ শতাংশ নম্বৰৰে উজলিল চয়নিকা