Prindër, s'keni mundësi t'i çoni fëmijët në plazh? Ky vend në Tiranë është zgjidhja ideale

TIRANË- I kthyer në një vend argëtimi për fëmijët dhe jo vetëm, për të tretin vit radhazi në Parkun e Madh të Liqenit, Bashkia e Tiranës po organizon kampin veror ku të gjithë të vegjlit që nuk kanë mundësi të shkojnë në plazh, mund të socializohen dhe të argëtohen falë programit të posaçëm të hartuar për ta.

Nënkryetarja e Bashkisë së Tiranës Anisa Ruseti deklaroi se kampi është i hapur çdo ditë për grupmoshat nga 5-13 vjeç, por të mirëpritur janë edhe ata pak më të vegjël të shoqëruar me gjyshet dhe me gjyshërit e tyre. ?Ndërkohë që të gjithë qytetarët e Tiranës i drejtohen plazheve, ose pushimeve, Bashkia Tiranë ka menduar për ata që e kanë të pamundur të jenë gjatë gjithë periudhës së gushtit, në këto ditë të nxehta të jenë drejt plazhit, kështu që ka krijuar një kamp veror te liqeni. E ka filluar këtë që në datën 15 korrik dhe do të jetë deri më datën 15 shtator kur do të fillojë shkolla. Kampi frekuentohet çdo ditë nga 30 - 50 fëmijë dhe deri tani kemi pasur një frekuencë prej 900 fëmijësh. Mosha është 5-13 vjeç, por ndërkohë për të gjithë ata që janë pak më të vegjël, i mirëpresim, gjithmonë të shoqëruar me gjyshet dhe me gjyshërit e tyre?, tha Ruseti.

Kampi veror i ngritur nga Bashkia e Tiranës do të zgjasë gjer më 15 shtator. ?Unë ftoj të gjithë qytetarët e Tiranës që kanë fëmijë të vegjël, të frekuentojnë që nga ky moment e deri në datën 15 shtator kodrat e liqenit, për të marrë pjesë në kampin veror më fantastik të Tiranës?, tha ajo.

Liqeni mbetet një nga atraksionet më të mëdha të Bashkisë së Tiranës duke ofruar momente qetësie por edhe argëtimi pa fund.