Gaite de la Tor Gerdez entor Les mus, se Deus, vos voie ! C'or sont a sejor Dame et seignor Et larron vont en proie Hu et hu et hu et hu ! Je l'ai veüe La jus soz la coudroie Hu et hu et hu et hu ! A bien pres l'ocirroie D'un douz lai d'amors De Blancheflor, Compains, vos chenteroie, Ne fust la poor Del traïtor Cui je redotteroie. Hu et hu et hu et hu ! Je l'ai veüe La jus soz la coudroie Hu et hu et hu et hu ! A bien pres l'ocirroie Compainz en error sui K'a cest tor Volentiers dormiroie N'aiez pas paor Vost a loisor Qui aller vuet par voie Hu et hu et hu et hu ! Or soit teü Compainz a ceste voie Hu et hu! Bien ai seü Que nos en avrons joie. Ne sont pas plusor Li robeor; N'i en a qu'un que voie Qui gist en la flor Soz covertor Cui nomer n'oseroie Hu et hu et hu et hu ! Or soit teü Compainz a ceste voie Hu et hu! Bien ai seü Que nos en avrons joie. Cortois ameor Qui a sejor Gisez en chambre coie N'aiez pas freor Que tresq'a jor Poez demenez joie. Hu et hu et hu et hu ! Or soit teü Compainz a ceste voie Hu et hu! Bien ai seü Que nos en avrons joie. Gaite de la Tor Vez mon retor De la ou vos ooie; D'amie et d'amor A cestui tor Aie ceu que plus amoie Hu et hu et hu et hu ! Pou ai geü En la chambre de joie Hu et hu! Trop m'a neü L'aube qui me guerroie Se salve l'onor Au Criator Estoit tot tens voudroie Nuit feïst del jor Jamais dolor Ne pesance n'avroie. Hu et hu et hu et hu ! Bien au veü De Biauté la Montjoie Hu et hu! C'est bien seü Gaite, a Deu toute voie.
