IPL 2022 | पहिल्याच सामन्यात मुंबई इंडियन्सच्या माजी गोलंदाजाला धक्का, ब्रावोचा नवा विक्रम

आयपीएलच्या १५व्या हंगामाला सुरूवात झालीय. पहिल्याच सामन्यात गतविजेते चेन्नई सुपर किंग्जला पराभवाचा धक्का बसला. कोलकाता नाईट रायडर्सने त्यांचा ६ विकेटनी पराभव केला. या सामन्यात माजी कर्णधार महेंद्र सिंह धोनीने विस्फोटक फलंदाजी केली पण तो संघाला विजय मिळवून देऊ शकला नाही. पहिल्या लढतीत चेन्नईचा अनुभवी जलद गोलंदाज ड्वेन ब्रावोने आयपीएलमधील सर्वाधिक विकेट घेण्याच्या विक्रमाशी बरोबरी केली. ३८ वर्षीय ब्रावोने या सामन्यात ४ षटकात २० धावा देत ३ विकेट घेतल्या. त्याने वेंकटेश अय्यर, नितिश राणा आणि सॅम बिलिंग्स यांची विकेट घेतली. बिलिंग्सला बाद करताच ब्रावोच्या नावावर आयपीएलमधील सर्वाधिक विकेट घेण्याचा विक्रम जमा झाला. याबाबत त्याने मुंबई इंडियन्सचा माजी जलद गोलंदाज लसिथ मलिंगाच्या विक्रमांशी बरोबरी केली. या दोघांनी प्रत्येकी १७० विकेट घेतल्या आहेत. आयपीएल २००८ मध्ये मुंबई इंडियन्सकडून पदार्पण करणाऱ्या ब्रावोने १५२ सामन्यात १७० विकेट घेतल्या आहेत. २२ धावा देत ४ विकेट ही त्याची सर्वोत्तम कामगिरी आहे. पहिल्या ३ हंगामात मुंबईकडून खेळणारा ब्रावो त्यानंतर चेन्नई संघाशी जोडला गेला. २०१६ मध्ये तो गुजरात लायन्सकडून खेळत होता. २०१३ आणि २०१५ साली त्याने पर्पल कॅप जिंकली होती. आता पुढील सामन्यात ब्रावोला मलिंगाचा विक्रम मागे टाकण्याची संधी आहे. मलिंगाने २०१९ मध्ये अखेरचा आयपीएल सामना खेळला होता. त्याने १२२ सामन्यात १७० विकेट्स घेतल्या आहेत. मलिंगाने सर्व लढती या मुंबई इंडियन्सकडून खेळल्या आहेत. या यादीत भारताचा अमित मिश्रा तिसऱ्या स्थानावर आहे. त्याने १६६ विकेट घेतल्या आहेत. या हंगामात तो कोणत्याही संघाकडून खेळत नाही. चौथ्या स्थानावर पियुष चावला असून त्याच्या नावावर १५७ विकेट आहेत. तर हरभजन सिंगने १५० विकेट घेतल्या आहेत.