Ish-nënkryetari Bujar Spahiu merr drejtimin e Komunitetit Mysliman Shqiptar. Zgjedhjet e nxorën atë fitues, përballë myftiut të Tiranës, Ylli Gurra, një nga tre kandidatët e mbetur në garë pas tërheqjes së ish-kreut Skënder Bruçaj dhe myftiut të Kukësit, Islam Hoxha. Por edhe pse ka në krye një emër të ri, Komuniteti Mysliman doli i përçarë nga këto zgjedhje. Pas daljes së rezultateve, Ylli Gurra foli për interesa të errëta që ndikuan në proces.
?Kemi një farsë të organizimit të zgjedhjeve në këtë mënyrë?, tha Gurra, duke akuzuar ?një organizëm okult, ata të cilët i kanë imponuar KMSH, mënyrën e zgjedhjes së anëtarëve, edhe të disa myftive, por edhe të shoqërisë civile, por edhe katapultimin e titullarit. Organizatë të cilët dihen publikisht?Ajo çka prekët ju gylenistët, apo kemalistët, apo dikush tjetër gjetkë sigurisht që nuk janë pa ndikime në këtë rrjedhë ngjarjesh dhe në të tilla katapultime të krerëve të KMSH të këtij vendi, sepse detyrimi i parë është që shqiptarët ta zgjedhin vetë kryetarin pa ndikime, qofshin këto organizative, qofshin financiare, apo ideologjike.?
Por në fjalët e para menjëherë pas kurorëzimit si kryetar për një mandat 5-vjeçar, Bujar Spahiu garantoi ruajtje të unitetit dhe traditës në drejtimin e Komunitetit Mysliman Shqiptar.
"Unë siguroj shtetin shqiptar, ndërmjet jush, se do të shërbej në këtë detyrë me përkushtimin e një njeriu të bindur ndaj Zotit dhe do të bëj përpjekjet e mija maksimale të jem një shqiptar i mirë dhe një qytetar i mirë. KMSH nën lidershipin tim do të ruajë traditën e paraardhësve të mi të nderuar. Do të jetë puna ime parësore, ruajtja dhe forcimi i harmonisë dhe dialogut ndërfetar në Shqipëri?.
Kontestimi i zgjedhjeve nga një prej kandidatëve e vë Spahiun përballë një misioni të vështirë, atë për të shuajtur përçarjet e krijuara në Komunitetin Mysliman nga zgjedhja e tij. Në votimin për kreun e Komunitetit Mysliman morën pjesë 87 anëtarë. Bujar Spahiu arriti në marrë 59 vota, Ylli Gurra 26 vota, ndërsa myftiu i Lushnjes, mori vetëm 2 vota.
