కేసీఆర్ వరాల జల్లు

Telangana CM KCR Addressed the Gathering of Home Guards at Pragathi Bhavan in Hyderabad on Wednesday.

హోంగార్డులపై తెలంగాణ ముఖ్య‌మంత్రి కే చంద్రశేఖర్ రావు వ‌రాలు కురిపించారు. ప్ర‌గ‌తి భ‌వ‌న్‌లో హోంగార్డుల‌తో స‌మావేశ‌మైన‌ సీఎం కేసీఆర్.. వారి జీతాల‌ను రూ.20వేల‌కు పెంచుతున్న‌ట్టు ప్ర‌క‌టించారు. అలాగే ఏడాదికి రూ.వెయ్యి చొప్పున పెంపును అమ‌లుచేయ‌నున్న‌ట్టు హోంమంత్రి నాయిని న‌ర్సింహారెడ్డి, డీజీపీ మ‌హేంద‌ర్ రెడ్డి స‌మ‌క్షంలో వెల్ల‌డించారు.
హైదరాబాద్ న‌గ‌రంలో ప‌నిచేసే హోంగార్డుల‌కు ఉచిత బ‌స్సు పాస్ సౌక‌ర్యం క‌ల్పించ‌నున్న‌ట్టు తెలిపారు. రాష్ట్రంలో ఒప్పంద అధ్యాపకులు, ఇతర సిబ్బందిని శాశ్వత ఉద్యోగులుగా మార్చేందుకు ప్రభుత్వం సిద్ధంగా ఉందని స్పష్టం చేశారు.ఈ రోజు నుంచి ప్రత్యేక కానిస్టేబుల్ నియామకాల్లో హోంగార్డులకు 25 శాతం రిజర్వేషన్ కల్పిస్తామని సీఎం కేసీఆర్ వెల్లడించారు. రిజర్వ్‌డ్ కానిస్టేబుళ్ల నియామకంలో హోంగార్డులకు 15 శాతం రిజర్వేషన్ కల్పిస్తామని తెలిపారు. డ్రైవర్ల నియామకంలో హోంగార్డులకు 20 శాతం రిజర్వేషన్ కల్పిస్తామన్నారు. రోస్టర్ విధానం లేకుండా ఎలాంటి నియామక ప్రక్రియ జరగొద్దని ఉన్నతాధికారులకు సీఎం సూచించారు. కమ్యూనికేషన్ విభాగంలో హోంగార్డులకు 10 శాతం రిజర్వేషన్ ఇస్తాం. ట్రాఫిక్ కానిస్టేబుళ్ల ఆరోగ్య పరిస్థితిని అర్థం చేసుకుని అలవెన్సులు పెంచినట్లు సీఎం చెప్పారు. పెంచిన అలవెన్సులు 2018 జనవరి నుంచి అమలు చేస్తామని చెప్పారు. ట్రాఫిక్ విభాగంలో పనిచేసే హోంగార్డులకు శాశ్వత ఉద్యోగితో సమానంగా అలవెన్సు ఇస్తామని వెల్లడించారు. పోలీసు, హోంగార్డుల కుటుంబానికి మంచి వైద్యబీమా సదుపాయం కల్పిస్తామని సీఎం పేర్కొన్నారు. పోలీసు ఆస్పత్రుల్లో పోలీసులతో సమానంగా హోంగార్డులకు వైద్య సదుపాయాలు అందించనున్నట్లు చెప్పారు.