كلمات الشاعر محمود الطويل
****
الدم بيروى الأرض تنبت زهرة فل
و الزهره تشب حريق
ف عيون الطفل الطالع رغم الذل
و الننى ف عين الطفل برئ و جرئ
و الليل ان زاد
فى بلدنا سواد
راح تفضل شمس يناير كف تشاور ع الجلاد
و تطالب يالاعدام
وتسافر بالاحلام
خطوه لقدام
انا ح افضل أحلم بيكى و اشوف
الشمس الطالعه على المكشوف
وبعز الضي
بتطق ف وش المال الداير فى الأسواق
خناق للضى
حتسير القدم الحافيه تدب تواكب نبض القلب
و حتعلن ان الشارع حى
الشارع حي
ولا زى
الايد الشايلة سلاحها بعنف
و لا زى الحرف
ان لف بيلضم كلمة و يفتح سكه لبكره الجى
و برغم عن الزنازين
و خيانة الوالى و كل بطانته حدادى القصر كلاب عابدين
وبرغم الموت الناس جايين
ملايين .. ملايين
زارعين فى الجو شموس طالعين
وف رحم الأرض جنين
Comments