Më 18 shkurt protestohet për shpresën e vrarë. Kështu u shpreh për Ora News kryetari i FRD, Belind Këlliçi duke shtuar se ky është momenti i duhur për ti thënë ndal asaj që PD e konsideron shkatërrim të vendit. Këlliçi: Problematike kryesore është vrasja e shpresës e cila është masive, nuk është vetëm për të rinjtë, problemi nuk është vetëm te papunësia e të rinjve që është në shifra rekord, zyrtarisht nga INSTAT thuhet se është diku rreth 40%, papunësia e të rinjvë nën moshën 35 vjeç, por problem i madh është vrasje e shpresës për këta të rinj, por jo vetëm është edhe për vetë qytetarët. Kryetari i të rinjve demokratë nënvizoi se vihet re një pakënaqësi e qytetarëve për këtë qeveri dhe numri i protestuesve do të jetë dëshmia më e mirë për ta vërtetuar. Këlliçi: Qytetarët, jo vetëm anëtarët të FRD, jo vetëm anëtarë të PD por të gjithë qytetarët janë të motivuar për të ardhur në protestën e 18 shkurtit. Pritshmëritë janë më të mira se cdo herë tjetër. Jam i bindur se kjo do të jetë protesta më e mirë e organizuar nga PD në këto vite opozitë.
Për më shumë lexoni në: http://www.oranews.tv/vendi/kellici-me-18-shkurt-protestohet-per-shpresen-e-vrare/
