Po mon moman, lo pli mové koudvan la ramas son souvnans sé sat la fane an katrovin sat la mét a mwin o mond, sat la parti samb tétin in trwa sominn la gér la gaign bout fout a tér po vin an la misér ék ravaz, ravinaz la pli, la parti in marmayaz défrisé sat la tér nout peï la fine sitangorzé y gaign pi niabout siporté bé té ti siport kisa don? pa twé minn sa domand zéd pars ton kaz la kasé? twé minn sa bat la min po préfé kank ni batiz ton sité? la di apél a li... yasint
sa koudvan la, li la vane mon vintan, ravine mon peï fane mon vavang, mon zévi, vir si vant mon véli sa koudvan la, li la filas koko, mét ti toulit soul saroy do lo, ral tignass kann an voulvoul sa l'van disnéfsankatrovin isi a mwin po fé koul dé lo dann mon siyo mi rak, mi rash, mét mon kolé si biyo do lo dann la riviér y koul, li lé an gro grin mi yémré bout gaign lo gou, n'srés kin srin dévlopman lé an margoz, an lo d'sél dann mon gosyé li koul, an larson, an lo sal férblan d'grés samb ri an zékli mon zézér té sonye pa son bonomm, mé nak zordi zot féklér la fine vég in dé, kisé l'boug la brad bonér la sold lonér plas pari sou goudron na leskine ou malgasine y vand son koudrin sak zoli na son lépine an do lé, do myél, y pinn la misér dann L.E.S na pwin d'boubou d'kér ki gaign pa di samb SMS romans yasint sa té d'lo en saroyaz siklone zordi y vant dann fierté, pli k'dann feytol
