Apnay Ehsaas Se Choo Kar Mujhe Sandal Kar Do with Lyrics (Wasi Shah) - Urdu Poetry by RJ Imran Sherazi

apnay ehsaas se choo kar mujhe sandal kar do
mein ke sadiyon se adhoora hoon mukamal kar do

na tumhein hosh rahay aor na mujhe hosh rahay
is qadar toot ke chaho, mujhe pagal kar do

tum hatheli ko mere pyar ki mehndi se rango
apni aankhon mein mere naam ka kajal kar do

is ke saye mein mere khawab dhak uthein ge
mere chehre pe chamakta hua aanchal kar do

dhoop hi dhoop hoon mein toot ke barso mujh par
is qadar barso meri rooh ko jal thal kar do

jaisay sehraon mein har shaam hawa chalti hai
is tarah mujh mein chalo aor mujhe thal kar do

tum chupa lo mera dil oat mein apnay dil ki
aor mujhe meri nighaon se bhi ojhal kar do

masla hoon to nigahein no churao mujh se
apni chahat se tawaja se mujhe hal kar do

apnay gham se kaho har waqt mere sath rahay
aik ehsaan karo is ko musalsal kar do

mujh pe chha jao kisi aag ki soorat janaa
aor meri zaat ko sookha hua jangal kar do

Poet: Wasi Shah
Voice: Imran Sherazi