壹週刊攝記得獎背後　露宿者交友感悟生死

壹週刊攝記得獎背後　露宿者交友感悟生死

《壹週刊》高級攝影記者高仲明（阿Ming），在香港攝影記者協會舉辦之《前線 ‧ 焦點 2015》比賽中，獲得兩個獎項，其中一輯《旺角夾縫的2600日》相片，奪得圖片故事組冠軍。相片記錄了露宿者雄叔生前，雖然獲派公屋卻寧願瞓街的故事。阿Ming與雄叔更成為好友，助雄叔走完人生最後一程，為他尋找失散多年的家人。

阿Ming由認識雄叔到把他的生活結集成圖片故事，全因一個偶然而起：「我去咗雄叔住嘅嗰條巷，做關於外國藝術家嚟香港塗鴉嘅圖片故事，就認識咗佢。」阿Ming憶述，雄叔是一個與別不同的露宿者：「我等咗好多日都唔見藝術家，佢就同我講：『你日日喺度餵蚊，不如留電話俾我，我見到佢哋，再急call你飛的嚟仲好，唔使咁辛苦。』」一切，由雄叔的主動關懷而起。

阿Ming漸漸與患上癌症末期的雄叔熟絡，即使塗鴉故事已經出版，阿Ming每星期都會到Mong Kok Alleyway兩、三次，與雄叔打邊爐、傾舊事：「通常我去佢住嘅地方，我會先大嗌：『雄叔，我嚟喇！』，佢會應我：『你嚟喇，阿高！』……雄叔話，以前做黑社會、睇場嘅時候，同屋企關係太差，太太帶走咗一對仔女，好唔開心，佢叮囑我，唔好做錯事。」

露宿多年的雄叔冇人冇物，阿Ming幾乎是唯一見證他身體狀況每況愈下的人，他甚至將自己的身後事交託阿Ming：「過身前一個月，他有託過我，講我知仔女姓名、出生日期，想我幫佢搵親人。十幾年冇見過，好想死前見到。但當時我抄低，當聽咗算。」

「最後一晚，我見佢情況太差，話不如送你去醫院啦。雄叔死都唔願意，話入醫院一定會死，仲同我講，如果聽日再嚟，可能就你幫我收屍……我惟有話，如果聽日情況都仲係咁，我就會報警，迫你去醫院。」翌日，阿Ming再來到雄叔的棚前大嗌：「雄叔，我嚟喇！」幾分鐘過去，無回音：「我揭起布，佢睜大眼、張開口，我意識到佢可能過咗身，但仲去拍他，希望佢只係瞓咗、暈咗，未死，但其實已經過咗身……我都有後悔，嗰刻我唔知點做。」

阿Ming起初想以朋友身份幫雄叔殮葬，但警察指一定要由家人負責，他才醒起，雄叔仔女的名字寫在他筆記簿上。阿Ming於是托朋友在社交網絡搜尋，成功找到雄叔的親生仔，希望他能幫手殮葬：「初時係佢嘅前妻打返俾我，佢唔信我，覺得雄叔以前呃過佢，以為我係大耳窿想呃佢。 」最後阿Ming將自己的詳細資料告訴她，她才相信：「佢打返嚟話，唔好意思，我頭先咁樣對你。」

作為記者，採訪時都盡可能以第三身角度窺探事件，避免介入受訪者的生活。阿Ming就表示，他和雄叔的故事是緣分，是以朋友的角色去完成：「我冇諗咁多，最初我冇諗過個故仔出街。」他想記錄這位朋友，走在人生最後一段路的生活。

阿Ming指，他至今仍無法理解，為何像雄叔這樣的露宿者，寧願瞓街都唔上公屋，或者，是因為他不欲無人傾談？但若果雄叔沒有走上街頭，也不會遇上攝記，也不會讓大眾明白露宿者的心聲。雄叔的故事刊出後，在香港及大陸引起迴響，令人關注香港基層。

「一個人以前做過咩事都好，一個老人家，都過身喇，應該值得被人尊重。」阿Ming的這輯圖片故事，獻給在天國的雄叔，還有香港的弱勢社群。

撰文：關冠麒　攝錄：葉漢華
來源：http://nextplus.nextmedia.com/news/latest/20160316/370819