Shtabi lokal i BDI-së është dëmtuar në fshatin Kanatllarë të Prilepit, rajon ky në të cilin partia e Ali Ahmetit për herë të parë ka dalë me kandidat për deputet. Bartësi i listës për deputet në njësinë zgjedhore numër 4, Nexhati Jakupi tha se shtabi i partisë së tij do të vazhdojë të funksionojë edhe pse ai është thyer thuajse tërësisht. Jakupi tha se ky rast është i paprecedent.
"Mendojë se ky rast është i paprecedent dhe ka nxitur një hidhërim tek popullata vendase dhe simpatizantët e BDI-së. Siç është e njohur në opinion, BDI garon për herë të parë në këtë njësi zgjedhore dhe ne po bëjmë aktivitet gati 1 muaj në mënyrë aktive ashtu siç bëjmë nëpër të gjitha zonat tjera. Kemi hapur shtabe lokale në të gjitha vendbanimet e vogla dhe të mëdha ky jetojnë simpatizantë dhe aktivistë, tani edhe anëtarë të BDI-së. Për fat të keq, kjo i ka penguar dikujt dhe ka sulmuar në mënyrë barbare shtabin lokal të BDI-së. Rasti është paraqitur në SPB Prilep, në OSBE dhe në ambasadat tjera të akredituara në vend", tha Nexhati Jakupi, kandidatë për deputet në njësinë zgjedhore 4.
Ndërkohë mbrëmë gjatë tubimit të BDI-së në Komunën e Haraçinës, kryetari i kësaj partie Ali Ahmeti iu bëri apel partive politike maqedonase që të mos bëjnë shantazhe në vendbanimet ku shqiptarët janë pakicë. Ahmeti kërkoi nga ata, që të krijojnë kushte për zgjedhje të lira dhe demokratike.
"Ata duhet të angazhohen që t'u krijojnë kushte që të votojnë dhe le të deklarohen lirshëm, për kë duan ata, pasi informatat e mia nuk janë të mira dhe nga ky vend apeloj që partitë maqedonase të jenë më të kujdesshme. Me frikësime nuk ecet përpara, krijohen armiqësi. Millosheviqi u përpoq t'i frikësojë shqiptarët, por ju e dini se ku përfundoi ai", deklaroi Ali Ahmeti, kryetar i BDI-së.
Nga MPB-ja thonë se rasti i dëmtimit të shtabit lokal të BDI-së në fshatin Kanatllarë të Prilepit është paraqitur dhe po punohet në zbardhjen e tij dhe kapjen e autorëve. Ndërkohë, MPB informoi se gjatë 24 orëve të fundit janë dëmtuar, me dëme më të vogla, edhe 4 shtabe lokale të VMRO DPMNE-së; një në Manastir dhe tre në Shkup. Ndërkohë MPB-ja po punon edhe në zbardhjen e rastit ku u dëmtua një shtab lokal i LSDM-së në Çair. Valmir Kuçi
