Analistët politikë vlerësojnë se zgjedhjet e parakohshme parlamentare do të ishin të dobishme për Maqedoninë vetëm nëse ndryshon përbërja e qeverisë. Duke komentuar nismën e BDI-së për zgjedhje të reja përpara skadimit të mandatit të qeverisë aktuale, Ismet Ramadanit thekson se qeverisja me parterin e njëjtë i cili e ka treguar veten për qëndrimet anti-evropiane, anti-NATO dhe neglizhent ndaj çështjes së emrit, nuk do të ofronte zgjidhje.
"Edhe BDI-ja, PDSH-ja por edhe RDK-ja duhet të bëjnë një marrëveshje, dhe para opinionit të dalin me paralajmërojnë se nëse në zgjedhjet e ardhshme parlamentare fiton prapë Gruevski me VMRO-DPMNE në, partitë politike shqiptare nuk janë të interesuara të bashkë-qeverisin me të. Unë e di se me një paralajmërim të tillë do të unifikohet më shumë blloku maqedonas sidomos ai nacionalist, por atëherë faktori ndërkombëtar do të bëjë një ndërhyrje më serioze sa i përket Maqedonisë dhe të gjendet një partner më progresiv maqedonas i cili është i gatshëm të bashkëpunojnë me subjektet shqiptare me qëllim që të hapet rruga e integrimeve", deklaroi Ismet Ramadani, analist.
Nga ana tjetër, sipas analistit Nano Ruzhin, ulja e besueshmërisë ndaj partive në pushtet, dëshpërimi i opinionit qoftë maqedonas apo atij shqiptar nga politikat e gabuara të kësaj strukture qeverisëse janë arsyeja kryesore që e çuan BDI-në të kërkojë zgjedhje të parakohshme parlamentare. Për sa i përket zhbllokimit të integrimeve, Ruzhin vlerëson:
"Mendoj se është arsyetim i rrejshëm sepse do të jemi dëshmitarë..ndoshta ka qenë naiv nëse i kanë premtuar një gjë të tillë ashtu siç janë naiv perëndimorët, naivë që i besojnë Gruevskit. Le të përpiqet ta zgjidhë nëse gjen momentin. Megjithatë anketat tregojnë se pushteti është i rrezikuar, dallimet janë 3-4 %. Përmes një fushate të suksesshme dhe me shmangien e faktorit të frikës, mund të fitojë opozita. Në atë rast, Ahmeti ka të drejtë, ai mund të gjejë një partner më të përshtatshëm për zgjidhjet e çështjeve strategjike të vendit", tha Nano Ruzhin, analist.
Sipas Ruzhinit, nxitja e zgjedhjeve ka të bëjë gjithashtu me faktin se VMRO DPMNE ka frikë nga viti 2015, kur vendi pritet të përfshihet nga një krizë ekonomike, për shkak se atëherë nis kthimi i borxheve dhe thellimi i pasigurisë sociale. Në kushte të tilla partia në pushtet do ta kishte të vështirë të bindte elektoratin. Semra Jakupi
