Remembering East Pakistan
nazm - daanaayi
دانائی
کَفشِ پا میں جِن کی تِھیں دانائیاں
کھو چُکے تھے اَپنی جو بِینائیاں
تِشنہ ءِ خُوں غُولِ خاک و خَس ہُوئے
قَوم پَر اَپنی ہی تھِیں چَڑھائیاں!
عِصمَت و جاں کے لُٹیروں کی ہُوئیں
آشکارا ظَرف کی نِیچائیاں
لَشکَروں کے ہاتھ سَب لُوٹی گَئیِں
مَشرِقی بَنگال کی رَعنائیاں!
شاد ہو گَر تُم مُبارَک ہوں تُمہیں!
ذِلَّت و اِدبار کی گَہرائیاں
سَر کے بَل قاسِر گِرائیں گی تُجھے
خُود تِری پَرواز کی اُونچائیاں !
خُود کو تَمغوں سے سَجایا بھی مَگَر
تِھیں مُقَدَّر میں فَقَط رُسوائیاں !
لاکھ بَدلو تُم نِصابوں کو مَگَر
مِٹ نہ پائیں گی کَبھی سَچّائیاں !
دے گَئیِں تُم کو شِکَستِ جاوِداں
رُخ بَدَلتے وَقت کی اَنگڑائیاں !
ناچتی ہیں آج بھی سَر پَر عقیلؔ
مَشرِقی بَنگال کی پَرچھائیاں !
sikander aqeel ansari