زمان قبل ما يقع جدار الخوف كانت الحيطان ليها ودان.. لكن النهاردة وبعد ما سقط جدار الخوف _والبركة في الثورة اللي لسة يا ولداه مش عارفة تسقط غيره_ صحيح ان الحيطان لسة ليها ودان.. بس مش مهم لإن الجميل ان الحيطان كمان بقى لها صوت .. زمان كنا بنخاف وقال يعني كنا بنقصر الشر وفاكرين ان من خاف سلم وماشيين جنب الحيطة وبنترجاها تدارينا.. لكن النهاردة، ومع ان الشر لسة مش بعيد، لكن في عز ما هو فاكر انه لسة قادر يمشينا جنب الحيطة كنا احنا بنطق الحجر والحيطان وبعلو الصوت ضد الخوف وضد القهر وضد الظلم وضد الكذب، وبنكتب صفحة جديدة بالألوان الطبيعية عشان خاطر عيون الحرية والعدالة والكرامة الانسانية وعلى عينك يا تاجر في كل شارع وكل حارة في بلدنا.. واللي ما يشتري يتفرج يمكن لما يتفرج ييجي عليه اليوم ويشتري القضية.. والبركة في ايدين تتلف في حرير زي ايدين ضيوفنا كدة:
عمرو المليجي
محمد فتحي ميشو
اميرة النحاس
سوزي