ريم ماجد: تعظيم سلام لـ مصر لسة منورة بأهلها #Jan25

مساء الخير على كل الورد اللي لسة بيفتح في شوارع وميادين مصر.. وتسلم كل الخطاوي العزيزة اللي لسة بتخطي لبكرة بالمشوار واثقة الخطى تمشي ملكاً.. وتعظيم سلام لشعب لا بيكل ولا بيمل ولا بينحني ولسة ما عاش ولا كان اللي يهد حيله أو يكسر عينه أو يجيب مناخيره الأرض.. تعظيم سلام لشعب لسة قادر يكون عند حسن الظن بيه ولسة قادر يخيب ظن كل من يستهون بيه او يفتكر انه يقدر ياخده على قد عقله، لإن عقله في راسه ويوزن بلد بزيها خاصة لما تكون بلد زي بلدنا عجوزة لكن مش كركوبة وعمرها ما تشيب مهما شاب الزمن وعجز، تفضل هي صبية ومعجبانية وبهية.. فتعظيم سلام لبلد لسة منورة بأهلها ولشعب عمره ما خذلها والرهان عليه دايماً كسبان.