بلدنا بالمصري: الداخلية تطلب مهلة لإعادة الهيكلة

موضوع اعادة هيكلة وزارة الداخلية، ريقنا نشف احنا وغيرنا نطالب بيه من أول لحظة.. وسائل اعلام ومنظمات حقوقية ومتخصصين وظباط وأمناء شرطة ومبادرات شعبية، كل دول بقى لهم سنة بيهاتوا ولا حياة لمن تنادي بحجة انه عيب ما تقولوش كدة، الداخلية بخير غيرش بس ان نفسيتهم تعبانة وخاطرهم مكسور والصبر جميل.. او بحجة انه مش وقته والأمن بعافية لما يشد بس حيله_مع ان اعادة الهيكلة اول خطوة عشان المن يشد حيله_ ومرة بحجة "عايزين ايه اكتر من كدة ديه الداخلية عملت اكبر عملية تطهير في تاريخها وطلعت في الاخر عملية قص ولزق وتباديل وتوافيق وكان الله بالسر عليم.. لحد ما الوزارة نفسها أعلنت اخيراً والحمد لله عن خطة لاعادة الهيكلة لسة ما حدش عارف لها ملامح.. الخطة ديه اللي ما كانش ليها لا حس ولا خبر في بيان الحكومة اللي اكد ان الأمن أولوية قصوى، كانت الموضوع الرئيسي النهاردة قدام لجنة الدفاع والأمن القومي في مجلس الشعب.. وزارة الداخلية طلبت مهلة لاعادة الهيكلة ولجنة الدفاع والأمن القومي وعدت بانها مش هتفرض الهيكلة ولا هتتدخل في عمل الوزير لكن هتستنى النتايج (انشاءالله وعلينا خير)