بلدنا بالمصري: وزير الداخلية وإنهاء خدمة الضباط

دة كان رد فعل الشارع ولسة حنيجي لرد فعل القوى الوطنية وائتلافات شباب الثورة، بس قبلها وزي ما حضراتكوا شوفتوا وسمعتوا كدة، إن من ضمن القرارات اللي الدكتور عصام شرف أعلن في كلمته إنه خادها، وتحديداً في البند ثانياً، قال بالحرف الواحد: "أصدرت تعليمات مُباشرة لوزير الداخلية بضرورة إصدار قرار بإنهاء خدمة كافة القيادات والضباط المُتهمين في قضايا قتل الثوار".. لكن البند دة بالذات ما عداش بالساهل كدة مش بس على وزير الداخلية، لكن كمان على ائتلاف ظباط الشرطة_اللي رجع تاني لقواعده سالماً_ وعلى عدد من ائتلافات شباب الثورة... وزير الداخلية، اللوا منصور العيسوي، قابل النهاردة الدكتور عصام شرف، وصرح بعد اللقاء لوكالة أنباء الشرق الأوسط إن: " قال منصور عيسوي، وزير الداخلية، إنه التقى صباح الأحد، رئيس مجلس الوزراء الدكتور عصام شرف، وأكد أنه «لن ينفذ أي قرار خاص بالضباط المتهمين بقتل المتظاهرين إلا وفقاً للقانون». وإن " رئيس مجلس الوزراء مش من اختصاصه إصدار أى قرار يخص الضباط الذين يمثلون حالياً أمام محاكم الجنايات بتهمة قتل المتظاهرين وإن القرار دة في ايدين وزارة الداخلية لوحدها». لدرجة إنه هدد بالاستقالة لو القرارات ديه اتنفذت