KPS Gill ਦੀਆਂ ਸਿਫਤਾਂ ਕਰਨ ਦੇ ਮਾਮਲੇ ਤੇ ਕੁਲਬੀਰ ਜ਼ੀਰਾ

KPS Gill ਦੀਆਂ ਸਿਫਤਾਂ ਕਰਨ ਦੇ ਮਾਮਲੇ ਤੇ ਕੁਲਬੀਰ ਜ਼ੀਰਾ ਨੂੰ ਤਜਿੰਦਰ ਸਿੰਘ ਦਿਓਲ ਦਾ ਜਵਾਬ
ਕੁਲਬੀਰ ਜ਼ੀਰਾ ਨੂੰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਤਜਿੰਦਰ ਸਿੰਘ ਦਿਓਲ ਦਾ ਜਵਾਬ
ਆਪਣੇ ਪਿਤਾ ਦੀ ਪੰਥਕ ਸੋਚ ਦੇ ਉਲਟ ਬਿਆਨ ਦੇ ਰਹੇ ਹਨ ਕੁਲਬੀਰ ਸਿੰਘ ਜੀਰਾ ਯਾਦ ਰੱਖਣ ਕੇ ਜੇਕਰ ਕੇ ਪੀ ਐਸ ਗਿੱਲ ਵਰਗੇ ਅਫਸਰ ਲਾਉਣਾ ਚਾਹੁੰਦਾ ਹੈ ਤਾਂ ਅਜੇ ਰਸ਼ਪਾਲ ਸਿੰਘ ਛੰਦੜਾਂ ਦੇ ਵਾਰਿਸ ਜਿਉਂਦੇ ਨੇ — ਤਜਿੰਦਰ ਸਿੰਘ ਦਿਓਲ
ਸ. ਇੰਦਰਜੀਤ ਸਿੰਘ ਜੀਰਾ ਨੂੰ ਪੰਜਾਬ ਦੇ ਲੋਕ ਇੱਕ ਪੰਥਕ ਪਿਛੋਕੜ ਅਤੇ ਪੰਥ ਪ੍ਰਤੀ ਸਮਰਪਿਤ ਸੋਚ ਵਾਲੇ ਆਗੂ ਵਜੋਂ ਯਾਦ ਕਰਦੇ ਹਨ। ਭਾਵੇਂ ਜੀਵਨ ਦੇ ਆਖ਼ਰੀ ਪੜਾਅ ਵਿੱਚ ਉਹ ਕਾਂਗਰਸ ਨਾਲ ਜੁੜ ਗਏ ਸਨ, ਪਰ ਉਨ੍ਹਾਂ ਦੀ ਲੰਮੀ ਰਾਜਨੀਤਿਕ ਪਛਾਣ ਅਤੇ ਵਿਚਾਰਧਾਰਾ ਉੱਤੇ ਪੰਥਕ ਸੋਚ ਦੀ ਛਾਪ ਰਹੀ। ਅਫ਼ਸੋਸ ਹੈ ਕਿ ਅੱਜ ਉਨ੍ਹਾਂ ਦੇ ਪੁੱਤਰ ਕੁਲਬੀਰ ਸਿੰਘ ਜੀਰਾ ਵੱਲੋਂ ਕੇ.ਪੀ.ਐੱਸ. ਗਿੱਲ ਵਰਗੇ ਅਧਿਕਾਰੀਆਂ ਦੀ ਲੋੜ ਦੱਸਣਾ ਆਪਣੇ ਪਿਤਾ ਵੱਲੋਂ ਪਾਏ ਪੂਰਨਿਆਂ ਅਤੇ ਉਨ੍ਹਾਂ ਦੀ ਪੰਥਕ ਵਿਰਾਸਤ ਦੇ ਬਿਲਕੁਲ ਉਲਟ ਹੈ।
ਕੇ.ਪੀ.ਐੱਸ. ਗਿੱਲ ਦਾ ਨਾਂ ਪੰਜਾਬ ਦੇ ਉਸ ਕਾਲੇ ਦੌਰ ਨਾਲ ਜੁੜਿਆ ਹੋਇਆ ਹੈ, ਜਦੋਂ ਹਜ਼ਾਰਾਂ ਸਿੱਖ ਨੌਜਵਾਨਾਂ ਦੇ ਕਥਿਤ ਝੂਠੇ ਮੁਕਾਬਲਿਆਂ, ਗੁੰਮਸ਼ੁਦਗੀਆਂ ਅਤੇ ਮਨੁੱਖੀ ਅਧਿਕਾਰਾਂ ਦੀਆਂ ਗੰਭੀਰ ਉਲੰਘਣਾਵਾਂ ਦੇ ਸਵਾਲ ਉੱਠੇ। ਅਜਿਹੀ ਸੋਚ ਦੀ ਪ੍ਰਸ਼ੰਸਾ ਕਰਨਾ ਪੰਜਾਬ ਦੇ ਪੀੜਤ ਪਰਿਵਾਰਾਂ ਦੇ ਜ਼ਖ਼ਮਾਂ ਉੱਤੇ ਲੂਣ ਛਿੜਕਣ ਦੇ ਬਰਾਬਰ ਹੈ।
ਕੁਲਬੀਰ ਸਿੰਘ ਜੀਰਾ ਨੂੰ ਯਾਦ ਰੱਖਣਾ ਚਾਹੀਦਾ ਹੈ ਕਿ ਪੰਜਾਬ ਦੀ ਧਰਤੀ ਨੇ ਕੇਵਲ ਜ਼ੁਲਮ ਕਰਨ ਵਾਲੇ ਅਧਿਕਾਰੀ ਹੀ ਨਹੀਂ ਵੇਖੇ, ਸਗੋਂ ਸ. ਰਸ਼ਪਾਲ ਸਿੰਘ ਛੰਦੜਾਂ ਵਰਗੇ ਨਿਡਰ ਅਤੇ ਜ਼ਮੀਰ ਵਾਲੇ ਸਿੱਖ ਵੀ ਪੈਦਾ ਕੀਤੇ ਹਨ, ਜਿਨ੍ਹਾਂ ਨੇ ਸੱਤਾ ਦੇ ਹੰਕਾਰ ਅੱਗੇ ਝੁਕਣ ਦੀ ਬਜਾਏ ਉਸਦਾ ਡਟ ਕੇ ਵਿਰੋਧ ਕੀਤਾ। ਅੱਜ ਵੀ ਸਿੱਖ ਕੌਮ ਅੰਦਰ ਉਹੀ ਅਣਖ, ਜ਼ਮੀਰ ਅਤੇ ਇਨਸਾਫ਼ ਲਈ ਆਵਾਜ਼ ਬੁਲੰਦ ਕਰਨ ਦਾ ਜਜ਼ਬਾ ਜਿਉਂਦਾ ਹੈ।
ਪੰਜਾਬ ਨੂੰ ਮੁੜ ਪੁਲਿਸੀ ਦਹਿਸ਼ਤ ਵਾਲੀ ਸੋਚ ਦੀ ਨਹੀਂ, ਸਗੋਂ ਕਾਨੂੰਨ ਦੇ ਰਾਜ, ਮਨੁੱਖੀ ਅਧਿਕਾਰਾਂ, ਜਵਾਬਦੇਹੀ ਅਤੇ ਇਨਸਾਫ਼ ਦੀ ਲੋੜ ਹੈ। ਕੁਲਬੀਰ ਸਿੰਘ ਜੀਰਾ ਆਪਣਾ ਬਿਆਨ ਵਾਪਸ ਲੈਣ ਅਤੇ ਪੰਜਾਬ ਦੇ ਪੀੜਤ ਪਰਿਵਾਰਾਂ ਤੋਂ ਜਨਤਕ ਮੁਆਫ਼ੀ ਮੰਗਣ।