यंदाच्या वर्षी कोरोनामुळे अलका चौकात शुकशुकाट | Anant Chaturdashi | Ganeshotsav | Sakal Media

लक्ष्मी रस्ता, टिळक रस्ता, कुमठेकर आदी रस्त्यावर गणेश मंडळांच्या रथापुढे रंगावलींचे आविष्कार... गुलालाची, फुलांची उधळण... गणेश दर्शनासाठी सकाळपासून रस्त्याच्या दुतर्फा भाविकांची झालेली गर्दी हे चित्र यंदा कुठेच दिसले नाही. कोरोनामुळे साध्या पद्धतीने गणेश विसर्जन झाल्याने हे रस्ते सुने सुने होते, भाविकांच्या गर्दीने निर्माण होणारे चैतन्य देखील यंदा हरवले होते.
घरांतील गणपतीचे विसर्जन झाल्यानंतर नागरिकांची पाऊले मोठ्या गणेश मंडळाच्या गणपती विसर्जन मिरवणूक पाहण्यासाठी आणि गणेश दर्शनासाठी शहरातील मिरवणुकींचे विविध मार्ग आणि टिळक चौकाकडे वळत. सकाळपासून रस्त्याच्या दुतर्फा गर्दीने फुलून जात. गणेश मंडळे रस्त्यावर आल्यानंतर त्यापुढे ढोल पथकांचे वादन, घंटनाद, पारंपारिक नृत्ये होत. शाळकरी मुले त्यांची कला सादर करीत. नंतर महापालिकेच्या वतीने प्रत्येक मंडळाच्या अध्यक्षांना श्रीफळ देऊन सत्कार केला जात. नंतर मिरवणूक विसर्जन घाटाकडे निघत असे. पण या वर्षी हा नजारा पाहायलाच मिळाला नाही.
विसर्जनाच्या दिवशी ज्या रस्त्यावर दरवर्षी मिरवणुकींचे रथ जात, जिथे पाय ठेवायलाही जागा मिळायची नाही, त्या रस्त्यावरून आज वाहनांची गर्दी वाहात होती. मिरवणुकींच्या मार्गावर दरवर्षी परदेशी नागरिक दिसत. आबालवृद्धांची गर्दी होत. आई-बाप मुलांना कडेवर, कुणाला खांद्यावर बसवून रथांवरील आरास, आणि गणेश मूर्तींमधील चैतन्य दाखविण्यासाठी आटापिटा करीत. या वर्षी हे मानवी चैतन्य देखील हरविले होते. मंडळासमोर काही काळ ढोल ताशांचा आवाज, शंखनाद आणि बाप्पांचा जयघोष काहीवेळ घुमत होता. नंतर मात्र सर्वच शांत शांत.

Sakal Media Group is the largest independently owned Media Business in Maharashtra, India. Headquartered in Pune, Sakal operations span across newspapers, TV (SAAM TV), magazines, Internet, and Mobile. With a heritage of over 82 years Sakal Media Group Publishes the number 1 Marathi Newspaper in Maharashtra and also owns and operates its TV channel named SAAM TV.