Ai Mere Sare Logo | Ahmad Faraz | Poetry Junction

ab mire dūsre baazū pe vo shamshīr hai jo

is se pahle bhī mirā nisf badan kaaT chukī

usī bandūq kī naalī hai mirī samt ki jo

is se pahle mirī shah-rag kā lahū chaaT chukī

phir vahī aag dar aa.ī hai mirī galiyoñ meñ

phir mire shahr meñ bārūd kī bū phailī hai

phir se ''tū kaun hai maiñ kaun hūñ'' aapas meñ savāl

phir vahī soch miyān-e-man-o-tū phailī hai

mirī bastī se pare bhī mire dushman hoñge

par yahāñ kab koī aġhyār kā lashkar utrā

āshnā haath hī aksar mirī jānib lapke

mere siine meñ sadā apnā hī ḳhanjar utrā

phir vahī ḳhauf kī dīvār tazabzub kī fazā

phir vahī aam huiiñ ahl-e-riyā kī bāteñ

na.ara-e-hubb-e-vatan māl-e-tijārat kī tarah

jins-e-arzāñ kī tarah dīn-e-ḳhudā kī bāteñ

is se pahle bhī to aisī hī ghaḌī aa.ī thī

sub.h-e-vahshat kī tarah shām-e-ġharībāñ kī tarah

is se pahle bhī to paimān-e-vafā TuuTe the

shīsha-e-dil kī tarah ā.īna-e-jāñ kī tarah

phir kahāñ ahmarīñ hoñToñ pe duāoñ ke diye

phir kahāñ shabnamīñ chehroñ pe rifāqat kī ridā

sandalīñ paañv se mastāna-ravī ruuTh ga.ī

marmarīñ hāthoñ pe jal-bujh gayā añgār-e-hinā

dil-nashīñ āñkhoñ meñ furqat-zada kājal royā

shāḳh-e-bāzū ke liye zulf kā bādal royā

misl-e-pairāhan-e-gul phir se badan chaak hue

jaise apnoñ kī kamānoñ meñ hoñ aġhyār ke tiir

is se pahle bhī huā chāñd mohabbat kā do-nīm

nok-e-dashna se khichī thī mirī dhartī pe lakīr

aaj aisā nahīñ aisā nahīñ hone denā

ai mire soḳhta-jāno mire piyāre logo

ab ke gar zalzale aa.e to qayāmat hogī

mere dil-gīr mire dard ke maare logo

kisī ġhāsib kisī zālim kisī qātil ke liye

ḳhud ko taqsīm na karnā mire saare logo

اب مرے دوسرے بازو پہ وہ شمشیر ہے جو

اس سے پہلے بھی مرا نصف بدن کاٹ چکی

اسی بندوق کی نالی ہے مری سمت کہ جو

اس سے پہلے مری شہہ رگ کا لہو چاٹ چکی

پھر وہی آگ در آئی ہے مری گلیوں میں

پھر مرے شہر میں بارود کی بو پھیلی ہے

پھر سے ''تو کون ہے میں کون ہوں'' آپس میں سوال

پھر وہی سوچ میان من و تو پھیلی ہے

مری بستی سے پرے بھی مرے دشمن ہوں گے

پر یہاں کب کوئی اغیار کا لشکر اترا

آشنا ہاتھ ہی اکثر مری جانب لپکے

میرے سینے میں سدا اپنا ہی خنجر اترا

پھر وہی خوف کی دیوار تذبذب کی فضا

پھر وہی عام ہوئیں اہل ریا کی باتیں

نعرۂ حب وطن مال تجارت کی طرح

جنس ارزاں کی طرح دین خدا کی باتیں

اس سے پہلے بھی تو ایسی ہی گھڑی آئی تھی

صبح وحشت کی طرح شام غریباں کی طرح

اس سے پہلے بھی تو پیمان وفا ٹوٹے تھے

شیشۂ دل کی طرح آئینۂ جاں کی طرح

پھر کہاں احمریں ہونٹوں پہ دعاؤں کے دئیے

پھر کہاں شبنمیں چہروں پہ رفاقت کی ردا

صندلیں پاؤں سے مستانہ روی روٹھ گئی

مرمریں ہاتھوں پہ جل بجھ گیا انگار حنا

دل نشیں آنکھوں میں فرقت زدہ کاجل رویا

شاخ بازو کے لیے زلف کا بادل رویا

مثل پیراہن گل پھر سے بدن چاک ہوئے

جیسے اپنوں کی کمانوں میں ہوں اغیار کے تیر

اس سے پہلے بھی ہوا چاند محبت کا دو نیم

نوک دشنہ سے کھچی تھی مری دھرتی پہ لکیر

آج ایسا نہیں ایسا نہیں ہونے دینا

اے مرے سوختہ جانو مرے پیارے لوگو

اب کے گر زلزلے آئے تو قیامت ہوگی

میرے دلگیر مرے درد کے مارے لوگو

کسی غاصب کسی ظالم کسی قاتل کے لیے

خود کو تقسیم نہ کرنا مرے سارے لوگو



Recitation of poetry is d