दूर-दूर मैंने हांड डोल कै देखी दुनिया सारी महेन्द्रगढ़ रेवाड़ी मैं मैंने मिली खासियत न्यारी
रेल मै विदआउट बैठैं किशनगढ़ बालावास के गाळा के मा रातों हांडै बाळक पाल्हावास के नहाये पाछै सानी काटै भोंदू भोतवास के दूध के मा पानी बेचै रेवाड़ी के पास के बिना प्रीत के माणस सैं ये गजियापुर भाड़ावास के रिश्ते के मा झूठ बोलैं डाडरा सहारनवास के खड़े गाळ मैं डहीना के मुतै सबतै बड़ी बेमारी
पूळा बेचैं सबतै ज्यादा बाझला बेधलवास के सौदे के मा झूठ बोलैं बेरी नानगवास के गाजर ऊपर सिर कटवा लें महेन्द्रगढ़ देवास के दारु पी कै करैं उपद्रव कनीना चेलावास के फौजी माणस डरैं बहुधा राता और भोजावास के नळके ऊपर सिर फुड़वा लें लुखी गुजरवास के मंदोले मै डांट मारती ब्याहे वर कै नारी
उन्हाणी छितरौली लठ से मारैं बोली के पाणी भर भर गंजे होगे बुचावास झगड़ौली के अपणे मन मै सारे लीडर गाहड़ा और कारोली के गौरा कह दे राजी होज्यां सीगड़ा बुचौली के ऊंटडी नै जीप समझ लें मित्रपुरा चुडौली के प्याज ऊपर ज्यान दे दे फतेहपुरी दडौली के न्यौते टूटते दुबळे होगे झाड़ली के तिलकधारी
भाठा फोड़ैं सबतै ज्यादा मनेठी अहरौद के रोड ऊपर गन्दगी राखैं गुवानी बाछौद के ब्याहे पाछै घालैं कोन्या बीघोपुर मेघोत के रोड़ी बेचैं भेड़ चरावैं बलाना डाढौत के बीरां धोरै चीज मंगावैं खायरा खतौद के भैंस बेच कै झगड़ा कर ले स्याणा और बाघोत के सेहलंग के मा लठ बाज ज्यां जड़ै बटै माल सरकारी
मूंज कूटैं सबतै ज्यादा खत्रीपुर दुबलाना के बिना काम का झगड़ा करलें सीसोठ भगड़ाना के बवासीर के घणे डाक्टर पालड़ी बधवाणा के तम्बाकू मै डंडी मारैं सीहा और धवाना के जीमण के मा पाछै रहगे पोता और नौताणा के गाम गाम मै बणी पार्टी बहुत दूर घर गाणा के हंसराज इस इंटरनेट नै घर बैठा दिए प्रचारी
Comments