كلمات الشاعر ماجد يوسف
*****
هيلا هيلا
صلى عالنبى
يامهون
هون و النبى
هيلا هيلا
صلى عالنبى
يا مهون
هون و النبى
شيل يابا و حمل فوق راسى
و ان مالت اعدلها و واسى
طببلى جروحى و احساسى
و عاونى على تقل الشيله
يا مهون هونها الشيله
يا معدل عدلى الميله

يا شمس يا ريحة احبابى
صبيلى شعاكك فى جنابى
و اعملى لله مره حسابى
ما الكل بتديه بالكيله
يا مهون هونها الشيله
يا معدل عدلى الميله

الارض النديانه سريرى
و عينيكى الريانه حصيرى
بضحكلك صافى و ضميرى
معدول على طول مفهوش ميله
يا مهون هونها الشيله
يا معدل عدلى الميله

يا محنى ديل العصفوره
و الدمعه فى عينى شبوره
الاشيه اهى ماشيه و مستوره
قدرنى على حمل العيله
يا مهون هونها الشيله
يا معدل عدلى الميله

يا نسيم الليل لو تلمحنى
عدى و رطب ضهرى المحنى
و اهمسلى بكلمه تفرحنى
عن لقمه و هدمه و ضليله
يا مهون هونها الشيله
يا معدل عدلى الميله

هيلا هيلا
صلى عالنبى
يامهون
هون و النبى
هيلا هيلا
صلى عالنبى
يا مهون
هون و النبى
هيلا هيلا
يا مهون