بلدنا بالمصري: طلبة الجامعات رفضوا ندوات العسكر
- 12 years ago
صور الشهداء والمعتقلين من طلبة الجامعات والهتاف باسماءهم والقسم بدمهم كانوا حاضرين كمان بقوة في المسيرات الطلابية اللي خرجت النهاردة من 4 جامعات هي القاهرة وعين شمس والأزهر باتجاه وزارة الدفاع ضد حكم العسكر وللمطالبة بتسليم السلطة للمدنيين.. في نفس الوقت تقريباً، فيه مشهد هو نفسه اتكرر في 3 جامعات: جامعة حلوان وجامعة القاهرة وجامعة عين شمس، عدد كبير من الطلبة رفضوا باشكال مختلفة، الندوات اللي تم تنظيمها النهاردة في الجامعات التلاتة _وفي جامعات تانية الله أعلم_ لقيادات متقاعدة من قيادات الجيش للحديث عن دور المجلس العسكري في حماية الثورة وفي عملية التحول الديمقراطي لحين تسليم البلاد لسلطة مدنية منتخبة. أشكال الرفض بدأت كلها بالتظاهر قدام مقر الندوة وبالهتاف ضد حكم العسكر، لكن الأمر ما يسلمش من اكتر من كدة شوية، في جامعة القاهرة تم الغاء الندوة من حيث الأصل وفي جامعة حلوان ما كملتش وانتهت بمغادرة القيادات المتقاعدة في وسط هتاف الطلبة.