صباح ON: احتفال ثورة إيه ودم الثوار منشفش #Jan25

صباح الخير على جميع مشاهدينا وصباح الخير يا إيمان .. وصباح الخير على شعب مصر الرائع .. شعب مصر اللي أكد إنه مسالم حتى النفس الأخير وأن ثورته الأعظم في التاريخ .. يوم تاريخي في عمر المصريين .. 25 يناير 2012 أثبت أن ثورة الغضب مستمرة لاستكمال مطالبها وأن ما يحدث حولنا يستوجب الوقوف جميعا للعبور بمصر إلى مستقبل يستحقه المصريون الرائعين .. زي إمبارح كان ميلاد الثورة وإمبارح كان ميلاد نهضة مصر وتقدمها بولادها اللي زي الورد في الميادين.

كتير حاولوا يتعاملوا مع الثوار إنهم مجموعة متظاهرين .. لكنهم مش عارفين إن كل مصري حر جواه ثائر غاضب على أوضاعه إذا تأزمت بفعل الفساد .. كتير قالوا إن 25 يناير السنة دي فرصة للاحتفال بذكرى قيام الثورة .. احتفال إيه بثورة شهدائها لسه ما يعرفوش مين المتهم بقتلهم ده على اعتبار إن المتهم برئ حتى تثبت إدانته وحتى الآن قتلة الشهداء عايشين بينعموا من خير مصر في الوقت اللي أمهات الشهداء بيبكوا بدل الدموع دم حزنا على حق ولادهم المهدور.. بس ما تخافوش ربنا ما بيرضاش بالظلم .. وحق كل شهيد هيرجع حرية وعدالة وكرامة ضاعت سنين .