أون تيوب : مسيرة تضامنية لمصر في أمريكا

وزي ما حضراتكوا عارفين ان فكرة برنامج اون تيوب قائمة على مشاركة الفيديوهات اللي بيقوم بتصويرها افراد غير منتمين لأي جهات اعلامية وقنوات تليفزيونية كبيرة، وزي ما اطلق عليه مستقبل الإعلام الجديد، واللي بيتخطى كل الحواجز والحدود بدون أي رقابة او تحيز.
الفيديو اللي هايتم عرضه دلوقتي هو اكبر مثال ودليل على ده، فكل ثورات العالم حالياً متحدة ومتضامنة مع بعضها البعض، بسبب النشطاء اللي بيكونوا موجودين في المظاهرات وبيحاولوا يغطوا الأحداث وينشروها على صفحات الانترنت.
من الولايات المتحدة الأمريكية، نظم متظاهري حركة Occupy San Diego ، مظاهرة للتضامن مع ثوار مصر بسبب الإعتداء عليهم من قبل قوات الأمن المصري.
المسيرة اتجهت الى شوارع وسط المدينة وكانت رافعة شعارات تضامنية للثوار المصريين ضد اعتداءات الأمن وايضاً اعتراضهم على العنف المستخدم معاهم في سان دييجو.