An Urdu poem on birth anniversary of Quaid-i-Azam Mohammad Ali Jinnah
naqshaa
نَقشہ
قائِد تِرے چَمَن کا تو نَقشہ بَدَل گَیا
مَشرِق کا ایک بازُو ، بَدَن سے نِکَل گَیا
جَمُّوں خَیال و خوابِ پَرِیشاں ہے آج تَک
جَتھا سَپولِیوں کا تو ڈھاکہ نِگَل گَیا !
یُوں ہو گَیا ہے طالِبِ پَیکار پاسباں
مَجنُوں ہو راہِ عِشق سے جَیسے بِچَل گَیا
کَہتا تھا ہَم کو جو بھی ، عَزِیزانِ گُلسِتاں!
پَیروں تَلے چَمَن کے گُلوں کو کُچَل گَیا
پُوچھا کِسی نے خواب وہ قائِد کا کیا ہُوا؟
بے ساختہ ہی آنکھ سے دَریا اُبَل گَیا
زَنجِیرِ عَدل کھینچ کے دیکھی ہے جَب کَبھی
مُنصِف ہی حِرصِ خام کی خاطِر پِھسَل گَیا
نَیرَنگ باز پُتلی نَچاتا تھا شاہ کی
یہ کھیل کھیلنے کو کِھلاڑی مَچَل گَیا !
بَنگالیوں کے بعد بَلوچوں کی خیر ہو !
سَو راز گُمشُداؤں کا قِصّہ اُگَل گَیا !
تَزئِینِ گُلسِتاں کی جَسارَت پہ ہَر قَدَم
پُھولوں کو زیرِ کَفش مُحارِب مَسَل گَیا
سُنتے ہیں کوتوالِ شَہر گَھر سے اُٹھ گَیا !
اَپنا تو فَرطِ خوف سے دِل ہی اُچَھل گَیا
ہَر گوشہ ءِ جَمال پہ چھائی ہے تِیرگی
قائِد تِرے شَہر کا جَنازہ نِکَل گَیا !
رَنج و اَلَم کا اَیسا تَسَلسُل رَہا عقیلؔ
نوحہ زَنی میں اَپنا تو ذَوقِ غَزَل گَیا !
sikander aqeel ansari